Vil du dansa med meg i dag? Dansa meg inn i den nye dagen, i dette skjøre, vakre livet. Vil du dansa meg bort frå sorg og tap, vil du dansa meg bort frå tårer og savn, – dansa meg inn i den blå flammen inst i elden, der alt er no, sterkt, nært no?

Vil du halda meg tett, tett og føra meg inn i eit friminutt av pulserande glede. Eg skal sleppa deg etterpå, så du får gå.

Men no står eg her, klar i posisjon og ventar på at musikken skal spela opp. Vil du dansa?